Thursday, 28 June 2012

मन्दिर मस्जिद गिर्जामा ढोग्नेहरु बड्दैछन
भाकल राखेर गुनासा पोख्नेहरु बड्दैछन।

विश्वास कसलाई गर्ने र चारैतिर उही हाल
छलछाम र मनमा पाप बोक्नेहरु बड्दैछन।

होश गर है जिउ र ज्यान सुम्पिदिनेहरुले
नासो थमाइ भागिजाने लोग्नेहरु बड्दैछन।

धिक्कार त्यो जवानी होश गुमाउनेहरुको
अबोध शिशुलाई हुर्कन रोक्नेहरु बड्दैछन।

मात्रित्व र ममतामा नि शंका नै उब्जन्छ
आफ्नै रगतको मुल्य तोक्नेहरु बड्दैछन।

संसार चलाउने नारी पुरुष जान्दैनन् अझै?
छोराछोरी माझमा नाफा जोख्नेहरु बड्दैछन।

सभ्य समाजको निर्माण हो? प्रश्न गरिहेर्नु
उत्तर अड्काइ गलामा खोक्नेहरु बड्दैछन।।

No comments:

Post a Comment